ЎФА Футболни ривожлантириш бошқармаси вакиллари Жиззахда бўлишди

Шу муносабат билан ЎФА Футболни ривожлантириш бошқармасида янги ишчи гуруҳ тузилди. Айни пайтда гуруҳ вакиллари ЎФАнинг биринчи вице-президенти Умид Аҳмаджоновнинг топшириғи билан айни пайтгача Қорақалпоғистон Республикаси, Хоразм вилоятлари ва водийда бўлиб қайтдилар. 9 май куни ишчи гуруҳ Жиззахда бўлди.

Қувонарлиси шундаки, Жиззахда 2003-2006 йиллар оралиғида туғилган футболчилар ўртасида вилоят биринчилиги старт олиши арафасида. Аслида ЎФАнинг мақсади ҳам шундай, барча вилоятларда ўз чемпионатларини ишга тушириш. Бошқарма аъзолари Жиззах, Пахтакор, Шароф Рашидов ва Ғаллаорол туманларида бўлдилар.

Вилоятда футбол клублари асосан БЎСМлар орқали шаклланади. Табиийки, бу туманлардаги болаларни эҳтиёжини қондира олмайди. Шунинг учун сентябрь ойидан эътиборан барча ҳудудлардаги мактабларнинг терма жамоалари шакллантирилади ва вилоят футбол федерацияси томонидан назоратга олинади. Шу йўл орқали ЎФА Жиззахнинг чекка қишлоқларидан ҳам чиқадиган истеъдодларни пайқаш имкониятига эга бўлади.

Футболни ривожлантириш бошқармаси вакиллари 10 май куни Самарқандда бўлсалар, 11 майда Қашқадарё вилоятининг туманлари билан яқиндан танишадилар.