Одил Аҳмедов ва Тошкент шаҳар чемпионати

Ўзбекистон миллий терма жамоаси сардори, ҳозирда Хитойда фаолият олиб бораётган Одил Аҳмедов 13 ёшида Тошкентга кўчиб келган. Имтиҳонлардан муваффақиятли ўтиб, биринчилардан ҳозирги Республика Олимпия захиралари Коллежига ўқишга кирган. Бу ҳақда у шундай хотирлайди:

- Интернатда Баҳодир ака Каримов ва Григорй Колосовский қўл остида катта бўлдик. Колосовский энди иш ўрганаётган мураббийлардан эди. Баҳодир акани эса тажрибаси катта бўлиб, у кишидан кўп нарса олдик.

Бевосита шаҳар чемпионатига тўхталсам, бу болалар ўртасидаги энг зўр чемпионат. Катта футбол остонасида, ҳар якшанба бўладиган бу мусобақа бизнинг фаолиятимизда катта ўрин тутган. Биз якшанбани ҳар қандай байрамдан кўпроқ кутар эдик.

Интернат ва рақиблар ҳақида

Легионерликка айнан интернатда ўқиш орқали кўникканмиз. Ёш боламиз, уйимиздан анча узоқда. Ҳозирга ўхшаб бир деганда етиб олиб бўлмайди. Соғинч кучли бўларди. Лекин меҳнат қилишимиз кераклигини яхши тушунганмиз. Ундан ташқари, у ердаги муҳит жуда аъло даражада бўлган. Кейинчалик Ўзбекистон терма жамоасида мухлислар меҳрини қозонган кўпчилик билан бирга истиқомат қилардик.

Рақибларимиз ҳам кучли эди. “Пахтакор“, “Сергели“, “Трактор“, “Чиғатой“ каби командалар бўларди. Анзур Исмоилов, Фарҳод Тожиев, Азиз Ҳайдаров. “Сергели“ дарвозасини Лобанов қўриқларди. Яна кўпчилик кейинчалик ўйнаб кетишди.

Шу фурсатдан фойдаланиб, Тошкент шаҳар чемпионатида тўп тепаётган ёш укаларимга омад тилайман. Сизларга ҳам, бизнинг йўлимизни бериб, МТЖда шарафини муносиб ҳимоя қилишингизни тилайман.