ОЧЛда ўйнаб қанча пул ишлаш мумкин?
21 дек 2019 15:47
Новости

ОЧЛда ўйнаб қанча пул ишлаш мумкин?

Мухлисларни Осиё чемпионлар лигасининг мукофот жамғармаси қанчани ташкил этиши, ҳар бир клуб ютуқ учун қанча миқдорда пул олиши қизиқтириши бор гап.

Маълумки, келаси йил ОЧЛда учта клуб Ватанимиз шарафини ҳимоя қилади. "Пахтакор" тўғридан-тўғри гуруҳда ўйнаса, "Локомотив" билан "Бунёдкор" ўз иштирокини плей-оффдан бошлайди.

Шуни айтиш мумкин, 2020 йилги мавсумда ҳам ОЧЛ мукофот пуллари ҳозиргидек сақланиб қолади. Яъни, плей-офф ўтиш босқичида сафар учрашувига йўл олган ҳар бир жамоага йўлкира харажатлари учун 40,000 доллар, гуруҳ ўйинларидан бошлаб ярим финалгача 60,000 доллар ва финалга чиққан жамоаларга 120,000 доллардан пул берилади.

Бу борада ОФК Кубогида ўтиш босқичидан бошлаб токи финалгача бир хил 40,000 доллар миқдорида сумма ажратилган.

ОЧЛ ғолибига ОФК томонидан 4 миллион доллар, финалчига 2 миллион доллар берилади. ОФК Кубоги ғолиби 1,5 миллион долларга, финалчи эса 750,000 доллар миқдорида пулга эга бўлади. Шунингдек, ОФК Кубогида ҳар бир минтақа ғолибига 100,000 доллардан ажратилади.

Бундан ташқари Осиё чемпионлар лигасида 1/8 финалга йўл олган жамоаларнинг ҳар бирига 100,000 доллар, чорак финалга чиққанларга 150,000 доллар, ярим финалчиларга 250,000 доллардан пул мукофоти берилади.

Осиё чемпионлар лигасида гуруҳ босқичидан бошлаб токи ярим финалга қадар ҳар бир ғалаба учун клублар 50,000 доллар, дуранг учун 10,000 доллардан пулга эга бўлишади.