Нўъмон Ҳасанов Туркиядаги йиғин ва жамоадаги камчиликлар ҳақида нималар деди?

"Авваламбор клуб раҳбарларига шундай шароитлаб яратиб беришаётгани учун миннатдорчилик билдираман. Жамоанинг бу йилги таркибини ўзим танладим. Таркибнинг ўзаги сақланиб қолинишида, янги футболчиларни жалб қилишда клуб вице-президенти Отабек Саматовнинг кўмаги катта бўлди. 

Таркиб ҳақида фикр билдирадиган бўлсам, қишки трансферлар вақтида кўп янги футболчилар қўшилди. Айримлари кўрикдан ўтказилди. Ўйлайманки, яхши жамоа шаклланмоқда. Эндиликда уларни битта оила сифатида бирлаштириш, жисмоний томондан яхши ҳолатга келтириш устида иш олиб бормоқдамиз. Тўғри, бу осон эмас. Умид қиламанки, янги келган футболчилар жамоага тезда мослашишади. 

Футболчиларга кўпроқ ишлаш кераклигини тушунтиряпман. Чунки, олдимизга катта мақсад қўйилган. Буни улар англаши ва ҳис қилиши керак. Мени берилаётган кўрсатмаларим барча ўйинчиларга тегишлидир. Футболчиларнинг бир-бирларини ўзаро тушунишларини сўраб қолардим. Шунда бизга бир мунча осонроқ бўлади.

Туркиядаги йиғинимиз самарали бўлиши шубҳасиз. Бунда барча жамоада, бирга ёнингизда. Умумий қилиб айтганда футболчиларнинг яхши ва ёмон томонларини, характерини билиб олишим учун яхши имконият юазага келди, дея оламан. Ўзим учун кўп нарсаларни билиб олдим. 

Машғулотларни ёрдамчиларимнинг қўлига топшириб ўзим бир чеккада кузатиб турганим рост. Боиси, Тошкентдаёқ нималардир бўлаётганини пайқагандим. Ҳозир шу камчиликларни кўриб олганим яхши бўлди, чемпионат бошланганида эса кеч бўларди. 

Бундан буён машғулотларда кўпроқ тўп билан ишлашга эътибор қаратамиз. Қилинадиган ишларимиз кўп. Мавсум стартига эса 25 кун вақт қолди. Менимча камчиликларни бартараф этишим учун бу фурсат етарли. Менинг мақсадим битта - жамоам ақлли ва чиройли ўйин кўрсатиб, бизга ишонаётган вилоят раҳбарлари, мухлисларни хурсанд қилиш. 

Футболчилар билан ўтган йиғилишда машғулотларда уларга берган кўрсатмаларим асосида хатоларни, характерини яхши томонга ўзгартиришларини таъкидладим. Бу борада гаплашиб олдик. Умид қиламанки ҳаммаси яхши бўлади",- дейди Нўъмон Ҳасанов.