Неймар Европада сайловчи мақомини олмагани боис Бразилия президентлик сайловида овоз бермади

Неймар Бразилиядаги президентлик сайловларида овоз бера олмади.

Овоз бериш кеча, 2 октябрь куни бўлиб ўтди. Энг кўп овозни Луис Инасиу "Лула"да Силва (48,4 %) ва амалдаги президент Жаир Болсонару (43,2 %) олган. Улар 30 октябрь куни бўлиб ўтадиган сайловнинг иккинчи босқичида иштирок этади.

Эслатиб ўтамиз, аввалроқ Неймар унинг сайловолди кампанияси оҳангига рақсга тушиб, Болсонаруни қўллаб-қувватлаган эди.

Бироқ футболчининг ўзи овоз беришда қатнаша олмади, деб хабар берди "El Mundo". ПСЖ форварди Парижда "сайловчи мақоми"ни олиши керак эди, бироқ у Бразилиядан Европага кўчиб ўтганидан бери (у 2013-йилда "Сантос"дан "Барселона"га ўтган) керакли ҳужжатларни расмийлаштирмади. Шунинг учун футболчи фақат Сан-Паулу штатидаги сайлов участкасида овоз бериши мумкин холос.