“Наврўз” – “Пахтакор-79” хотира турнири ғолиби

Бу мусобақа 1979 йили авиаҳалокатга учраб, ёруғ оламдан кўз юмган “Пахтакор” жамоаси аъзолари хотирасига бағишлаб Хоразм вилояти очиқ биринчилиги тарзида ўтказилди.  Мазкур турнирда воҳанинг ўн битта жамоаси қатнашди.

Мусобақанинг очилиш маросимида Хоразм вилояти футбол федерацияси биринчи вице президенти Равшанбек Отажонов, урганчнинг “Умид ниҳоллари-2015” жамоаси бош мураббийи, футбол фахрийси Вали Султоновлар марҳум пахтакорчилар ҳақида ёш футболчиларга сўзлаб беришди. Шундан сўнг, “Пахтакор-79” жамоаси футболчиларига ҳурмат рамзи сифатида бир дақиқа сукут сақланди.

Икки кун давом этган биринчилик якунига кўра, Хоразм вилояти халқ таълими бошқармасига қарашли 2-сон Болалар ва ўсмирлар спорт мактабининг “Наврўз” жамоаси(мураббийлари Алишер Рўзметов, Акбар Одамов) мусобақа ғолиблигини қўлга киритди. Биринчиликнинг “Энг яхши ўйинчилари” номига Рўзмат Баҳромов(дарвозабон, БЎСМ-2), Азамат Қурёзов(ҳимоячи, Питнак шаҳри), Умид Султонов(ҳужумчи, “Наврўз”)лар сазовор бўлишди.

Турнирнинг ёпилиш маросимида ғолиб ва совриндор жамоалар, мусобақанинг энг яхши ўйинчилари турнир ташкилотчилари – Хоразм вилояти футбол федерацияси, “Камолот” ёшлар ижтимоий ҳаракати Урганч шаҳар кенгаши, шаҳар маданият ва спорт ишлари бўлими, Ўзбекистон “Маҳалла” жамоат фонди шаҳар бўлими ва бошқа ҳамкор ташкилотлар томонидан тақдирланишди.
   
Икром  ХУДОЙБЕРГАНОВ.