"Навбаҳор" vs "Насаф". Финалда ким гол уради?
27 окт 2022 02:56
Новости

"Навбаҳор" vs "Насаф". Финалда ким гол уради?

Теги : "Навбаҳор"Ўзбекистон кубоги финал "Насаф"

Наманган клуби сал кам чорак асрлик танаффусдан кейин мамлакат кубогида зафар қучиши мумкин.

Бунинг учун "Насаф" Бухорода таслим қилиниши керак. Бўлажак "жанг" ғолибини билмасак ҳам, олдинги финаллар натижасини таҳлил қилиш имкониятига эгамиз.

24 йиллик “камбэк”

“Навбаҳор” кубок финалида сўнгги бор 1998 йилда ўйнаган эди. Ўшанда Шуҳрат Раҳмонқулов билан Анвар Солиевнинг голлари “Нефтчи”ни енгиш учун етарли бўлган.

Умумий статистика шундай: Наманган клуби 4 марта финалга чиқиб, улардан 3тасини ўз фойдасига ҳал қилган. Ягона мағлубият 1993 йилда “Пахтакор”дан қабул қилинган.

1992 йил
“Навбаҳор” 0:0 “Темирйўлчи” (ҳозирги “Қўқон-1912”)
Пенальтилар сериясида 6:5 ҳисоби қайд этилган.
1993 йил
“Навбаҳор” 0:3 “Пахтакор”
Голлар: Нўъмон Ҳасанов, Миржалол Қосимов, Рифат Галеев.
1995 йил
“Навбаҳор” 1:0 МҲСК
Гол: Алексей Винников
1998 йил
“Навбаҳор” 2:0 “Нефтчи”
Голлар: Шуҳрат Раҳмонқулов, Анвар Солиев

8-уриниш

“Насаф” эса 7 марта Ўзбекистон кубоги финалида қатнашиб, улардан 5тасини Тошкент клубларига ютқазган. 7 та гол уриб, 12та ўтказиб юборган. “Аждарлар” мусобақанинг амалдаги ғолиби ҳисобланади.

Қашдақадарё клуби сафида қуйидаги футболчилар тўп киритган: Дилшод Мавлонов, Жаҳонгир Жиямуродов, Илҳом Юнусов, Артур Геворкян, Шерзод Аъзамов, Баҳром Абдураҳимов ҳамда Ғолиб Ғайбуллаев.

Факт: 30 октябрь куни майдонга тушиши мумкин бўлган футболчилардан 4 нафарида Ўзбекистон кубоги финалларида гол уриш тажрибаси бор. Энг қизиғи, уларнинг ҳеч бири ҳужумчи эмас: “Навбаҳор”дан Йован Жокич (2) ва Станислав Андреев, “Насаф”дан Баҳром Абдураҳимов билан Ғолиб Ғайбуллаев.