“Навбаҳор” – “Сўғдиёна” учрашувидан кейинги фикрлар

Даврон Файзиев, “Сўғдиёна” жамоаси бош мураббийи: “Ўтган турда навбатдаги ғалабани қўлга киритиб, олий лигада қолиш вазифасини бажарганимиздан хабарингиз бор. Шундай бўлсада футболчиларга бўшашмаслик кераклигини уқтирганди. Лекин, улар хотиржамликка берилиб ҳаракат қилишгани учун “Навбаҳор” бизни жазолади. Иккинчи бўлимда ҳисобни тенглаштиришга интилдик. Айнан шу сабабли ҳимоямизда бўшлиқлар пайдо бўлди. Бундан наманганликлар самарали фойдаланиб, кетма-кет иккита гол уришди. 1:0 ҳисобида ютқаздик нима-ю, 3:0 ҳисобида ютқаздик нима? Шу сабабли, ҳужумлар ташкил этгандик. Бироқ, имкониятларимиздан фойдалана олмадик. Бир сўз билан айтганда жамоамиз бугун ўзига ўхшамади”.

Мустафо Байрамов, “Навбаҳор” жамоаси бош мураббийи: “Ғалаба билан барчани табриклайман. “Насаф”га қарши учрашувдаги мағлубиятдан кейин мухлисларимиз олдида уялиб қолгандик. Шу сабабли, юзимизни ёруғ қилиш учун ғалаба учун майдонга тушгандик. Сафимизда бир қатор йўқотишлар бўлишига қарамай, кўзланган мақсадга эришдик. Иккинчи бўлимда амалга оширилган ўзгаришлар ҳам ўйинни кучайтирди. Ҳисоб бунданда йирикроқ кўриниш олиши мумкин эди. Бироқ, футболчиларимиз бир нечта имкониятлардан фойдалана олишмади”.