"Насаф" билан катта ютуқларга эришамиз" - Бердиевнинг грузиялик топилмаси яна нималар деди?

Тўғри таклиф қилинаётган футболчилар сон жиҳатдан кўп эмасдир, лекин жамоага фойда келтирадиган ижрочи эканлигини сезиш қийин эмас. Гап келиши биланоқ голлар уришга киришиб кетган грузиялик Жаба Жигаури ҳақида кетмоқда. Футболчи 3та ўртоқлик учрашувида 4та гол уришга муваффақ бўлди. Бу борада Жабанинг дастлабки таассуротлари билан қизиқдик.

- "Насаф" жамоасига хуш келибсиз. Ўзбекистонга кўчиб ўтишингиз фаолиятингизда муҳим ўзгаришми ёки бу сиз учун навбатдаги оддий трансфер?
- Бу албатта янги чақирув. "Насаф" жуда катта клуб ва ўз тарихига эга. "Насаф" катта бир оила экан, мен ушбу катта оиланинг аъзосига айланганимдан жуда хурсандман.

- Сизга Польша ва Европанинг турли клубларидан қизиқиш бўлганлигини эшитдим. Ўзбекистон вариантини ўйлаётганингизда, биринчи навбатда миллий чемпионат даражасига эътибор бердингизми ёхуд сизга қизиқаётган клубнинг даражасига?
- Менда Европадан аниқ таклиф бор эди. Улар менга шартнома таклиф қилишди ҳам, лекин "Насаф" мен учун энг яхши вариант эди. "Насаф" катта потенциал эга. Мен шу сабабдан "Насаф"ни танладим. Биз "Насаф" билан катта ютуқларга эришамиз.

- Ўзбекистон чемпионати ҳақида қандай фикрдасиз? "Насаф" жамоаси ҳақида аввал нималарни билар эдингиз?
- Ўзбекистон чемпионати яхши даражада. Барча клублар табиий майдонга эга. Чемпионат даражаси ҳам анча яхши. Мен Ўзбекистонда фаолият юритган танишларимдан маслаҳат сўраган эдим ва улар чемпионатингиз даражасини яхши баҳолашди.

- "Насаф"да 70чи рақамни танладингиз. Бунга сабаб нима? Рақам танлаганингизда нималарга эътибор берасиз?
- 70чи рақам Қарши учун катта аҳамиятга эга эканлигини биламан. Қаршиликлар футболни севишади. Ўртоқлик учрашувларида ҳам улар бизни ёлғизлатиб қўйишмади. Шу сабаб 70чи рақамни танладим. "Насаф" мухлисларини хурсанд қилиш ниятим бор.

- Сиз Европада "порлаётган" Хвича Кварацхелия билан бирга ўйнагансиз. У билан ҳали ҳам гаплашиб турасизми? Хвича "Наполи"да қолиши қанчалик тўғри ёки у янги даражага чиқиб бўлдими? Масалан Хвича Англия чемпионатида ўйнаб кета оладими?
- Ҳа, мен Хвича билан бирга ўйнаганман. Биз ҳали ҳам дўстмиз. У янги мавсумда "Наполи"да қоладиган бўлди. Кейинги мавсумларда бошқа клубларга ўтиши мумкин, лекин келаётган мавсумда у "Наполи"да бўлади. Менинг фикримча, Хвича ҳар қандай чемпионатда ёрқин ўйин намойиш эта олади.