Наҳотки? "Навбаҳор"нинг ғалабасиз серияси еттита ўйинга етди

Ўйиннинг 83-дақиқасида Неманья Йованович гол урганидан сўнг майдон эгалари ғалабага жуда яқин туришганди. Бироқ 90+2-дақиқада Шавкат Муллажонов тўп киритгач, баҳс дуранг билан якун топди.

Шу тариқа, "Навбаҳор"нинг кетма-кет ғалабасиз серияси еттита ўйинга етди. Бу жамоа сўнгги бор 7-турда "Шўртан" устидан 1:0 ҳисобида ғалаба қозонганди. Кейинги учрашувларда "Навбаҳор" бешта дуранг ўйнаб, икки бор мағлуб бўлди. Қизиғи шундаки, жамоа ўз майдонидаги охирги тўрт учрашувни дуранг билан якунлади.

"Навбаҳор" ўз уйида "Шўртан"ни мағлуб этганидан сўнг "Локомотив", "Қўқон-1912", "Бунёдкор" ва "Олмалиқ" клублари билан дуранг ўйнади. Қизиқ жиҳати, мана шу тўртта баҳсдан учтаси 1:1 ҳисоби билан тугади.

Лекин иккинчи томондан "Навбаҳор" ўз майдонидаги ўйинларда мағлуб бўлмади. "Навбаҳор"дан ташқари ўз майдонида ҳали ютқазмаган яна учта жамоа бор - "Локомотив", "Насаф" ва "Олмалиқ". Илҳом Мўминжонов шогирдлари биринчи давранинг охирги учрашувини сафарда "Насаф"га қарши ўтказишади. Бу ўйин 25 июнь куни бўлиб ўтади.