Муроджон Тошматов: “АГМК билан жорий йилда янги тарих яратмоқчимиз”

Миржалол Қосимов шогирдлари куни кеча пойтахтдаги машғулотларни якунлашди ва коронавирусга тест топширишди. Биз эса ўз навбатида эртанги ўйин олдидан жамоанинг тажрибали ярим ҳимоячиси Муроджон Тошматовнинг фикрларига қулоқ тутдик.

“Карантиндан сўнг тезда жипслашиб машғулотларни бошладик ва “Қизилқум” билан ўйинга аъло кайфиятда тайёргарлик олиб бордик. Ўйлашимча, 60 ёки 70 фоиз даражада оптимал спорт формасига кириб олдик. Ўйиндан ўйинга янада кучайиб борамиз.

“Қизилқум”да мураббий алмашди, табиийки рақиб ўз майдонида фақат ғалаба учун ўйнайди. Аммо, биз ҳам ортга ўзимиз учун ижобий натижа билан қайтишни истаймиз. Рестартни ғалаба билан бошлаш ёқимли албатта. Карантиндан сўнг нафақат “Қизилқум”, балки, барча жамоалардан кутилмаган сенсация кутиш мумкин. Ҳозирда ҳамма бир хил ҳолатда.

Клуб фаолиятида янги тарих ва саҳифа очишни мақсад қилганмиз. Насиб қилса жорий йилда бу ниятимизга етишишимизга ишонаман. Қўлга киритилган ҳар бир ғалаба бизни соврин сари яқинлаштиради.

Ҳожимат Эркинов ҳақида нима дея оламан? Тўғри тарбия бериб, тўғри йўл кўрсатилса келажакда кўп нарса кутса бўлади. Ўз ёш тоифасида машҳур футболчилардан бири бўлиши мумкин”,- дейди Муроджон Тошматов.