Мурод Исмоилов: “Рақибни менсимаслик шундай оқибатларга олиб келади!”

- Даставвал, “Оқ-тепа” жамоасини, мухлисларини чиройли ғалаба билан табриклайман! “Пахтакор”да ишлаганимда шогирдларим бўлган футболчиларнинг ўйинини кўриб улар учун хурсанд бўлдим. “Нефтчи” ҳақида нима дейишим мумкин? Рақибни менсимаслик шундай оқибатларга олиб келади. Кеча бўлиб ўтган Кубок баҳсларида “Динамо”, “Олмалиқ”, “Қизилқум” биринчи лига клубларига қарши ўйинларда мағлубиятга учраб мусобақани тарк этганди. Бу бизга дарс бўлгани йўқ. Футболчилар ақлини йиғиштириб олмади. Кеча ҳам шу ҳақида огоҳлантиргандик, аммо бугун яна билганларидан қолмади. Бунақа футбол ўйнаб бўлмайди!

- Биз ҳар бир учрашувга ғалаба мақсадида тушамиз. Мен футболчиларга доим айтаман: мухлисларнинг ҳурмати учун ҳам ўйнанглар. Агар бундай учрашувларда ўйнашни исташмаса ёки чарчоқ аломатлари бўлса, айтишсин, уларнинг ўрнига ҳаракат қиладиган футболчиларимиз бор.

- Бугунги мағлубият “Бунёдкор”га қарши ўйин олдидан футболчиларнинг руҳий ҳолатига салбий таъсир қилади, деб ўйламайман. Бугун бир қатор ёш ўйинчиларга имконият бергандик. Вазиятни ўзингиз кўрдингиз. Профессионаллик сари ҳали кўп ишлашимиз кераклиги бугун кўриниб қолди - дейди Мурод Музаффарович.