Мурод Исмоилов: "Бугунги ҳолатизмиздан келиб чиқиб айтадиган бўлсам, дуранг қониқарли бўлди"

- Аввало бугун ички ишлар ходимлари байрами билан юртимиздаги барча ички ишлар ходимларини табриклаб қоламан. Ўйинга келадиган бўлсак, "Бунёдкор" яхши жамоа. Ҳозирги ўрнига қарамай бу жамоа мамлакатимизнинг етакчи клубидир. Бугунги ўйин ҳам шуни кўрсатдики, ҳақиқатдан ҳам захираси кучли. Тактик ва жисмоний тайёргарлиги ҳам яхши. “Пахтакор”, “Насаф” ҳамда “Бунёдкор” клубларининг олиб бораётган тўғри сиёсати мана аста секин маҳсулини бермоқда. Бугун рақиб жамоа таркибида академия тарбияланувчиларини ўйнагани ҳам сўзимга исбот бўла олади.

Кучли жамоага қарши ўйнадик. Ўзига яраша биз ҳам шунга монанд тайёргарлик кўргандик. Биринчи бўлимда йигитларни озгина ҳаяжон босди шекилли. Лекин берган кўрсатмаларимизни имкон қадар тўғри бажаришга ҳаракат қилишди. Иккинчи таймда ўзимизда куч топа олдик ва бир қатор ҳужумлар уюштирдик. Лекин барибир “Бунёдкор” биздан бугунги кунда кучли эди. Шунга қарамай учрашув тенг курашлар остида ўтди. Имкониятлар бизга нисбатан уларда кўп бўлди. Албатта ютганимизда янада яхши бўларди. Лекин бугунги холатимиздан келиб чиқиб айтадиган бўлсак, дуранг ҳам қониқарли натижа дейиш мумкин. Боя айтганимдек, “Бунёдкор” биздан ҳар жиҳатдан кучли жамоа”, - дейди Мурод Музаффарович.