Мундиал олдидан. Хуршид Ғиёсов: "Майдонда биринчи рақамли жамоа бўламиз"

Кетиш олдидан футболчиларимиз сайтимизга фикрларини билдириб ўтди.

"Мана шу жаҳон чемпионатида иштирок этаётганимиздан жуда ҳам хурсандмиз. Осиё чемпионатида ҳам буни қўлга киритиш осон бўлгани йўқ. Ҳар бир футболчи бундай футбол байрамида иштирок этишни орзу қилади. Насиб бўлса яхши ўринлар билан юртимизга қайтишга ҳаракат қиламиз", - дейди Хуршид Ғиёсов.

- Жаҳон чемпионатига тайёргарликдан кўнглингиз тўлдими? Қанчалик тайёрман дея оласиз?

- Кетма-кет ташкил этилган шунча йиғинлардан сўнг жуда ҳам яхши тайёрганлик кўрдик. Хорижда ташкил этилган йиғинлар ва назорат ўйинларида имкониятларимизни баҳолаб олдик. Қанчалик тайёр эканлигимизни энди майдонда кўрсатган ўйинимиздан билиб оламиз. Португалия, Уругвай ёшлари билан бўлган ўйинлар жуда катта аҳамиятга эга бўлди. Гуруҳда рақибларимиз кучли ва бу ўйинларни ҳар бирига алоҳида кўрсатма билан майдонга чиқамиз.

- Ёшлар терма жамоаси жўнаб кетиш олдидан мураббийлар ва раҳбарият жамоа олдига аниқ бир вазифани қўйдими?

- Ҳар бир жамоа чемпионатда кубокни олиш учун боради. Биз ҳам шу мақсадда борамиз.

- Бунга имкониятимиз етадими?

- Нега етмайди? Албатта етади ! Бизни ёшлар ҳам ҳеч кимдан кам эмас. Биз ҳимоявий ўйин кўрсатмаймиз ва биринчи рақамли жамоа бўламиз. Мақсадим мана шу жаҳон чемпионатидан сўнг Ўзбекистонга ёруғ юз билан қайтишдир.