Муҳаммад Исаев: "Легионер сифатида ўйнаш истагим бор эди"

Шундан сўнг футболчининг фикрларига қулоқ тутдик.

"Металлург"да захирада қолиб кетаётгандим. Мураббийлар нимагадир менга ишонч билдиришмаётганди. Мен эса кўпроқ ўйин амалиётига эга бўлиш мақсадида бошқа жамоада ўзимни синаб кўрмоқчи эдим. "Металлург" билан дўстона хайрлашдик. 

Ўзбекистон Суперлигасининг бир қатор жамоаларидан таклиф бўлди. Лекин шахсан ўзим легионер сифатида ўйнаш ва кучимни Осиё Чемпионлар Лигасида синаб кўришни истадим, чунки “Истиқлол”дан аллақачон таклиф олгандим. Ўйлаб ўтирмасдан шу таклифни қабул қилдим ва жамоа сафига бориб қўшилдим. 

Жамоада мени яхши кутиб олишди. Тожикистоннинг бошқа клубларидаги шароитларни билмадим-ку, аммо келиб қўшилган жамоамда барчаси тўлақонли қониқтирди. Аслида “Истиқлол” ўтган йили ҳам таклиф билан чиққан эди, ўшанда "Металлург"да қолишни истагандим. 

Осиё Чемпионлар Лигасида муносиб иштирок этишни истаяпмиз. Дейлик, гуруҳдан кейинги босқичга чиқишни режалаштирмоқдамиз. Гуруҳимизда "Ал Ҳилол" билан қийин ўйинлар бўлади. Лекин биз барчасига тайёрмиз, ўтган йили "Истиқлол" ушбу жамоани мағлубиятга учратганди. “Ал Райян” билан ҳам жиддий ўйин кечади. Негаки, уларда ҳам яхши футболчилар бор”, – дея сўзини якунлади Исаев.