МТЖ машғулотларининг иккинчи куни

Иккинчи кун машғулотларида айтарли ўзгариш бўлмади. Фақат кубок ўйинидан кейин шунчаки шуғулланган футболчилар умумий гуруҳга қўшилдилар, холос. Бугун Сергеев билан Козак ҳам машғулотларда иштирок этишни бошлайди.

Енгил чигалёзди машқларидан кейин Шуҳрат Мақсудов футболчиларимизни иккига бўлди.
"Қизиллар" таркиби: Суюнов, Тўхтахўжаев, Ҳасанов, Ҳошимов, Турсунов, Мусаев, Искандеров, Муллажонов, Собирхўжаев, Шоаҳмедов ва ўйинчи камлиги боис Ашурматов.
"Кўклар": Нестеров, ака-ука Аҳмедовлар, Йўлдошев, Кримец, Зотеев, Мусаев, Муҳаммадиев, Рашидов, Нагаев, Олимов.

Айнан шу футболчилардан иборат терма Олмалиқда бўлиб ўтадиган ўйинда терма жамоамиз шарафини ҳимоя қилиши кутиляпти.

Бевосита машғулотларни кузатар эканман, Наврўз Олимов ва Ҳусниддин Ғофуров каби футболчиларимизни бегонасираётганини кўрдим. Йигитлар, ўзингизни қўлга олинг. Келажак сизларники!

Дарвозабонларимиз билан одатдагидек Пётр Гизимчук ишлади. Тўғрисини айтаман, авваллари бу мутахассиснинг иши унча ёқмасди. Аммо йиллар давомида тажрибасини ошира олганини кўряпман. Машғулотлар давомида посбонларимиз ҳаракатини кўп маротаба кузатганим учун, улардаги ўзгаришларни пайқамасдан бўлмасди. Акбар Тўраевнинг кичик жароҳати борлиги учун якка тартибда машғулот ўтказди.

Бугунги машуғлотларни Миржалол Қосимовнинг ўзи ўтказади ва эртага майдонга тушадиган таркиб ҳам бугун аниқланади.