Миржалол Қосимов: “Ўн бир ҳимоячига қарши ўйнаш осон эмас”

- Ярим финалга кучсиз жамоа етиб келмайди. “Динамо”нинг ҳимоядан ўйнашини билган эдик ва шунга яраша тайёргарлик кўргандик. Кутганимдек, бугун самарқандлик футболчилар 5-4-1 схемаси асосида ўз ўйинларини ташкил этишди. Бизга бугун тезкор гол етишмади. Отабек Шукуров, Акром Комиловда дарвозани ишғол қилиш учун яхшигина вазиятлар юзага келганди. Афсуски, улар бу имкониятдан фойдалана олишмади. Захирадан майдонга тушган ўйинчиларимиз эса мен нимани талаб қилаётганимни тушуниб етишмади. Бундай мустаҳкам ҳимояни фақат марказдан уюштириладиган ҳужумлар билан ёриб ўтиб бўлмайди. Шуни йигитларга тушунтириб, қанотлардан ҳужум ташкил қилишни уқтиргандим.

- Бугун “Нефтчи” билан бўлиб ўтган ўйиндаги шиддатни кўрмадик. Бунинг сабаби нимада?

- “Нефтчи” билан нисбатан очиқ футбол кўргандик. Бугун “Динамо”нинг 11 нафар ҳимоячисига қарши ўйнаш осон кечмади. Бизнинг футболчиларга ақл етишмади. Бошқа томондан ҳали ҳеч нарса йўқотилгани йўқ. “Динамо” ҳам ўз майдонида мағлубиятга учраб, Муборакда кечган жавоб учрашувида ғалаба қозониб кетди. Нима учун биз Самарқандда зафар қучмаслигимиз керак?

- “Динамо” кўрсатган ўйин ҳақида фикрингиз қандай?

- Футболчилар бугун ўз мураббийлари кўрсатмаларини тўлиқ бажаришди. Ҳимояда бехато ҳаракат қилишди.

- Миржамол Қосимовнинг бугунги ўйини ҳақида нима дейсиз?

- Хатолари бор, буни ўзи ҳам билади. Унда барибир Миржалол Қосимовнинг ўғли деган тушунча миясида туради. Шу нарса унга ўйинда ҳалал бериб келяпти. Ўзига ҳам бу ҳақида кўп гапираман. Машғулотларда ҳам тинмай ишлаяпти. Ҳамма таътилга чиққанида у машғулотларни давом эттирди. Аста-секин ҳаммаси ўз изига тушиб кетади.