“Металлург” қизларининг байрам совғаси

Бекободнинг “Металлург” жамоаси қизлари дастлабки учрашувни сафарда “Бунёдкор”га қарши ўтказиб, 2:1 ҳисобида ғалаба қозонишди. Бу ғалаба Бекобод ишқибозларига ажойиб байрам совғаси бўлди.

Мазкур учрашув жуда қизиқарли курашлар остида ўтди ва жамоалар биринчи бўлимнинг ўзида дарвозаларга 3 та гол киритишди. Меҳмонлардан Наргиза Абдурасулова ҳамда Моҳинур Ҳожиқуловалар муваффақиятга эришишган бўлишса, майдон эгаларидан жавоб голини Мардона Эламасова киритди.

Жавоб ўйини 3 сентябрь куни Бекободда ўтказилади ва ярим финалда тўп сурадиган сўнгги жамоанинг номи аниқланади. Табиийки майдон эгаларининг имкониятлари юқори баҳоланмоқда. Бекободликлар бу тўсиқдан муваффақиятли ўтишса, ярим финалда мамлакатимизнинг энг тажрибали жамоаларидан бири – “Андижанка”га қарши майдонга чиқишади. Бу йилги чемпионат давомида “Металлург” жуда асосий ўйинда андижонликларни мағлубиятга учратишгани мухлисларнинг ёдидан чиқмаган бўлса керак. Иккинчи ярим финалда “Севинч” – “Лочин” жамоалари баҳс юритиши ҳозирда маълум. Ўзбекистон кубогининг финал учрашуви 7 ноябрь санасига режалаштирилган.