“Металлург” футзал бўйича мамлакат чемпионатида қатнашади

XXI миллий чемпионатдан эътиборан Бекободнинг “Металлург” мини футбол жамоаси ҳам кучлилар сафида иштирок этадиган бўлди. Кеча Ўзбекистон футбол федерацияси мажлислар залида ўтказилган йиғилишда олий лигада қатнашувчи жамоалар сони узил-кесил аниқланди ва чемпионат ўйинларига қуръа ташланди. Унга кўра биринчи турда “Металлург” узлуксиз 5 та ўйин ўтказиши маълум бўлди. Бекободликларнинг биринчи турдаги рақиблари Тошкентнинг “Локомотив”, “Ардус”, Самарқанднинг “Нафис”,  Андижоннинг “Турон-Солиқчи” ҳамда Бухоронинг “Когон” жамоалари бўлишади.

Бугун “Металлург” футзал жамоаси Ўзбекистон футзал ассоциациясида буюртмадан ўтади. Жамоада миллий чемпионатларимизда фаолият олиб борган бир қатор тажрибали ўйинчилар билан биргаликда катта футболда ёшлар таркибида ҳаракат қилган ўйинчилар ҳам мавжуд. Мавсум арафасида ташкил этилган “Ассоциация кубоги”да қатнашган ўйинчилар сафига Ғулом Мамажонов, Илҳом Юсупжонов ҳамда Шавкат Деҳқоновлар келиб қўшилишди. Ва ўз навбатида ўша турнирда ҳаракат қилган С.Шоаҳмедов, С.Маҳмудов сингари ўйинчиларнинг исми шарифлари буюртмономадан ўрин эгалламаган. Жамоанинг якуний таркиби ҳақида қўшимча маълумот берамиз. Эслатиб ўтамиз, “Ассоциация кубоги”да Николай Одушев шогирдлари гуруҳ босқичида иккита ўйинда ғалаба қозониб, иккита учрашувда имкониятни бой берган ва бешта жамоа орасида учинчи ўринни эгаллаганди.

1-босқич, 1-турнинг “Металлург” учун тақвими:

14 ноябрь, соат 12:00: “Металлург” – “Локомотив”

15 ноябрь, соат 18:00: “Нафис” – “Металлург”

16 ноябрь, соат 14:00: “Металлург” – “Ардус”

18 ноябрь, соат 14:00: “Турон-С” – “Металлург”

19 ноябрь, соат 16:00: “Металлург” – “Когон”