"Mehr News" агентлиги вакили: "Ўзбекистоннинг бу турнирда ғолиб бўлиш имкониятлари паст"

"Ироққа қарши ўйин қийин бўлади, чунки улар Яман ёки вьетнамликлардан кучлироқ.  Футболчилар жисмонан бақувват, майдонни яхши кўра олишади, қарорлар чиқаришда кам адашишади, қисқа ва узун пасларда яхши ҳаракат қилишади. Бироқ Эрон терма жамоаси ушбу учрашувда ғалаба қозона олади. Миллий жамоамиз ўйинчилари ҳам рақиб каби жисмонан кучли ва тартибли. Натижа биз учун ижобий бўлади деб умид қиламан.

Равшан Эрматов? Эрматовни яхши таниймиз. У Эронга кўп келган, "Озодий" стадионидаги учрашувларни бошқарган. У елкама-елка курашларга кўп имкон беради.
Тўпурарлар пойгаси? Сардор Азмун ва Элдор Шомуродов ушбу турнирда 3тадан гол урди. Азмун ҳақида тўхталадиган бўлсак, у ҳақиқий ҳужумчи. Сардор рақиб ҳаракатларини олдиндан ўқий олади ва қаерда зарба бериш ёки алдаш кераклигини яхши билади. Элдор Шомуродов ҳам яхши форвард. У Азмун каби Россия Премьер-лигасида ўйнайди. Тўпурарлар пойгасида Азмун ғалаба қозонишига умид қиламан.

БААда ўтаётган Осиё Кубогига Эрондан 20га яқин журналистлар ташриф буюришган. Мен ишлайдиган "Mehr News" нашрида 200дан ортиқ ходим ишлайди. Нашримизда футболни ёритадиган журналистлар сони 5 киши ва уларнинг барчаси ҳозир ушбу мусобақада ишлашмоқда.

Осиё Кубогида Ўзбекистон терма жамоаси ҳам иштирок этяпти. Айни дамда жамоангизни машҳур Эктор Купер бошқармоқда. Ушбу мутахассис ҳимоявий тактикани маъқул кўради. У кўпроқ ўз дарвозасини қуруқ сақлаш ҳақида ўйлайди. Ўз ғояси ва фалсафасига эга мураббий. Яқин йиллар ичида Купер жамоани янги даражага олиб чиқиши мумкин, аммо Ўзбекистон терма жамоасининг бу турнирда ғолиб бўлиш имкониятлари паст. Осиё Кубогида чемпионликка асосий даъвогарлар - Жанубий Корея, Япония ва Австралия" - дейди эронлик журналист.

Жасур Асланов суҳбатлашди