"Машъал": Давралар оралиғида ўзгаришлар ҳақида

"Машъал" бугун Жиззахнинг "Сўғдиёна" жамоасини қабул қилади. Ушбу учрашув олдидан давралар оралиғида жамоамизда бўлиб ўтган ўзгаришлар ҳақида маълумот бериб ўтамиз.

Биринчи даврадан сўнг 19 очко тўплаган ҳолда олтинчи поғонада бораётган "Машъал" сафини уч футболчи тарк этди.

Жумладан:

Отабек Нарзуллаев ўйин амалиётига кам эга бўлганлиги боис жамоамизни эрта тарк этди. Нарзуллаев иккинчи даврани "Бухоро" сафида давом эттиради.

Саламат Қутибоев ҳам жароҳатидан сўнг сафга қайтишда қийинчиликка учради ва иккинчи даврани бугунги рақибимиз "Сўғдиёна" сафида ўтказишга қарор қилди. Бугун Қутибоев "Сўғдиёна"даги илк учрашувини ҳам айнан "Машъал"га қарши ўтказиши мумкин.

Элдор Эргашев ҳам биринчи даврадан сўнг асосий таркибда майдонга туша олмади ва иккинчи даврани "Олмалиқ"да ўтказишни маъқул топди.

Жамоамизни бошқа футболчилар тарк этмаган.

Иккинчи даврада жамоамиз сафига фақатгина Шаҳзод Шайманов келиб қўшилди. Шайманов аслида "Машъал" футболчиси бўлиб , ўтган мавсумни ижара асосида "Андижон" сафида ўтказган эди. Иккинчи даврани Шайманов "Машъал"да давом эттиради.

Бугун 12:00 да клуб академиясининг мажлислар залида "Машъал" раҳбарияти, мураббийлари , фан-клуб, мухлислар иштирокида иккинчи давра олдидан йиғилиш бўлиб ўтади. Йиғилишда Шаҳзод Шаймановга ўз формаси тақдим этилади.