Мансур Давлетов: "Хоразм"ни олий лигага олиб чиқиш учун бор кучни ишга соламиз"

Жамоа айни пайтда Тошкентда йиғин ўтказмоқда. Шу аснода бош мураббий Мансур Давлетов билан суҳбатлашдик.

- Пойтахтдаги "Геофизика" қароргоҳида йиғин олиб бормоқдамиз. Машғулотлар билан бир қаторда синов-назорат учрашувларини ҳам ташкил этиб, футболчиларнинг имкониятларини кўздан кечиряпмиз", -  дея гап бошлади Хоразм бош мураббийи.

- Йиғинни Тошкентга кўчирганимиздан кейин таркибимизга бир қатор янги ўйинчилар келди. Хусусан, Илёс Хайров, Санжар Баратов, Аллаёр Реимов, Низом Норов сингари футболчиларни айни дамда синовдан ўтказяпмиз. Ундан ташқари яқин кунларда асли урганчлик Темур Бекчановнинг ҳам келиши кутилмоқда. Ўйлайманки расмий баҳслар бошлангунга қадар таркибни шакллантириб, асосий таркиб ўзагини аниқлаб оламиз.

- Ўтказган ўйинларимиздан келиб чиқиб шуни айтишим мумкинки, ҳали қилиниши керак бўлган ишлар кўп. Ҳар бир чизиқда камчиликлар бор. Уларни бартараф этиш учун машғулотларда ишлаяпмиз.

- Бу йил раҳбарият олдимизга жиддий вазифа қўйди. Яъни унга кўра жорий мавсум "Хоразм"ни кучлилар сафига олиб чиқиш. Уни бажариш учун мураббий сифатида бор билим ва маҳоратимни ишга солишга тайёрман. Ҳаммасини мавсум кўрсатади.

Исломбек Рустамбеков суҳбатлашди.