Маъмур Отақулов: “Ғиждувон” келгусида олий лигага чиқиш учун курашади”

Қуръадан сўнг Отақуловнинг фикрлари билан қизиқдик.

- Ўтган йили жамоамиз биринчи лигада илк мавсумини ўтказди. Афсуски иккинчи босқичга чиқа олмадик. Лекин шунга қарамай, йигитларни тарқатиб юбормадик ва аксинча улар билан янада ишладик. Жорий мавсум ҳам биринчи лигада иштирок этишни кўзлаётганимиз учун таркибимизни янада кучайтиришга уриндик. Асосий эътиборни барибир маҳаллий футболчиларга қаратдик. Йиғинни ноябрь ойидан бошлаганмиз. Ҳозирча ҳаммаси кўнгилдагидек. Шароитлар ҳам ўтган йилга нисбатан анча яхши. Стадион қурилиш ишлари тугатиб бўлинди", - деб гап бошлади Отақулов.

- Жамоамизнинг бош ҳомийси деб бирор номзодни айтиб бўлмайди. Чунки тумандаги бир қатор ташкилотлар бириктирилган. Уларнинг амалий кўмаги асосида жамоани шакллантириб бормоқдамиз.

- Юқорида айтиб ўтганимдек, таркибда асосан бухоролик футболчилардир. Ишқибозларимизга яхши таниш бўлган дарвозабон Мақсуд Шабановни ҳам таркибга жалб этганмиз.

- Бош мураббийнинг фаолиятидан қониқиш хосил қиляпмиз. 28 ёшли Сатторов ўқиб-изланувчан мураббийлар тоифасига киради. Унда керакли мураббийлик лицензияси мавжуд.

- Бугунги қуръа яхши ўтди деб ўйлайман. Ўтган йили ҳам Кубокда илк ўйинимизни сафарда ўтказгандик. Бу йил ўз майдонимизда ўйнашни ният қилган бўлсакда, қуръа барибир ўз сўзини айтди.

- Бу йил “Ғиждувон” ўз олдига энг аввало кейинги босқич йўлланмасини қўлга киритишни мақсад қилган. Энг камида 16та жамоа орасида бўлиш. Қолаверса 4-5-ўринларни эгалласак ҳам биз учун яхши натижа бўлади. 2-3 йил шу тариқа тажриба орттириб, келажакда олий лигага чиқиш учун курашамиз.

Исломбек Рустамбеков ёзиб олди