“Локомотив” Беларусда йиғин ўтказади

Мавсумнинг биринчи даврасини омадсиз ўтказган Тошкентнинг “Локомотив” клуби ўз анъанасига содиқ қолган ҳолда давралар оралиғида Беларусь давлатида ўқув-машғулот йиғинини ўтказади. 

Режага кўра, “темирйўлчилар” 19 июнь куни Минск шаҳрига жўнаб кетишади. Бу ҳақда “Локомотив” ҳужумчиси Марат Бикмаев бизга қисқача интервью берди. 

- Биринчи даврадаги омадсизликка молиявий масаланинг таъсири йўқ, - дея сўз бошлади М.Бикмаев. - Агар ҳаммаси молиявий таъминотга боғлиқ бўлганида, бу “Бунёдкор”нинг ҳам натижаларида акс этарди. “Қалдирғочлар” молиявий қийинчиликка қарамай, турнир жадвалида биздан юқорида боришяпти. Демакки, омадсизликка фақат ва фақат ўзимиз сабабчимиз. Бошқа ҳеч ким ва ҳеч қандай омил айбдор эмас.

- Клуб раҳбариятининг ёндашуви қандай? Чемпионатнинг қолган қисмида вазиятни ижобий томонга ўзгартира оласизларми?

- Раҳбарият ҳар ҳолда, хурсанд эмас. Лекин бошқа томондан, раҳбарлар ҳам вазиятни тўғри тушуниб, руҳиятни кўтаришга ҳаракат қилишяпти. Ўйлашимча, ҳаммаси ўз қўлимизда. Қайсидир маънода чемпионатни бошидан бошлаймиз. Натижаларни ижобий томонга ўзгартиришга қодирмиз, менимча. Олдинда хориж йиғини бор. Анъанага содиқ қолган ҳолда, Беларусь пойтахти Минск шаҳрида ўқув-машғулотлар ўтказамиз. Шу мақсадда 19 июнь куни сафарга жўнаб кетамиз. Табиийки, у ерда маҳаллий клублар билан бир нечта назорат учрашувлари ўтказамиз. Айни шу ўйинлар орқали чемпионатнинг қолган қисмига тайёргарлик кўрамиз.