Кин бразилияликларнинг рақси ҳақида: "Бу рақибга нисбатан ҳурматсизлик"

"Манчестер Юнайтед" собиқ сардори Рой Кин бразилиялик футболчиларнинг рақсга тушаётгани хусусида кескин фикрларни билдирди.

5 декабрь куни Тите шогирдлари ЖЧ нимчорак финалида Жанубий Кореяни йирик ҳисобда (4:1) мағлуб этишди.

"Кўзларимга ишонмаяпман. Ҳеч қачон бунчалик кўп рақсларни кўрмаганман. "Юлдузлар билан рақс" шоусини томоша қилаётгандекмиз. Мен бу маданиятнинг бир қисми эканлигини тушунаман, лекин бу рақибларга нисбатан ҳурматсизликдир. Тўртта гол уриб, ҳар сафар рақсга тушишяпти. Бир марта бўлса қарши эмасман, лекин улар қайта-қайта рақсга тушишяпти ва мураббий ҳам бунга қўшилмоқда. Бундан ҳайратда эмасман, бу яхши эмас", – деди Кин. 

Жанубий Кореяга қарши баҳсда Бразилия терма жамоаси бош мураббийи Ришарлисон томонидан киритилган учинчи тўпдан кейин футболчилар билан рақсга тушди.

Бразилия чорак финалда Хорватия билан куч синашади. Учрашув 9 декабрь куни бўлиб ўтади.