Келаси йил биринчи лигада фарм-клублар иштирок этмайди

Маълумки, бу йилги биринчиликда олий лига жамоаларидан “Пахтакор” ҳамда “Бунёдкор”нинг фарм-клублари иштирок этишди. Келаси йил эса “Машъал” ҳам ўзининг фарм-клубини тузиб (жамоа номи катта эҳтимол билан “Машъал-Академия” булади), биринчи лига ўйинларига қўймоқчи.

-   Биз спорт принципларига амал қилган ҳолда келаси йилдан бошлаб биринчи лига баҳсларига фарм-клубларни қўймоқчи эмасмиз, - дейди Фарҳод Магометов. – Чунки бу жамоалар барибир ўз олдиларига олий лигага чиқиш мақсадини қўймайди. Шу боис бизга олий лига клубига алоқаси бўлмаган мустақил жамоалар керак. Секин-аста биринчи лига савиясини ҳам кўтармасак бўлмайди, бунинг учун эса фарм-клублардан воз кечишимизга тўғри келади.

-   Агар қайсидир жамоа молиявий муаммо туфайли биринчи лигада қатнашмайдиган бўлса, унда фарм-клубларнинг ўйнашига рухсат бериладими?
-   Ўйлайманки, келаси йилги чемпионатда бунақаси бўлмайди. Мабодо кимдир биринчи лигада тўп сура олмайдиган бўлса, унда фарм-клублар масаласини балки кўриб чиқишимиз мумкин.

Хайрулла Холиқов.