Кечаги ўйиндан кейин матбуот анжумани ўтказилмади

Бунинг аниқ сабаблари бизга маълум эмас. Маълумки, халқаро даражадаги ўртоқлик ўйинларидан сўнг матбуот анжуманини ташкил қилиш кўп жойда одат тусини олган.

Аслида учрашувдан бир кун олдин ҳам анжуман ташкил қилинмади. Матбуот анжуманларини ўтказиш футбол тарғиботи учун ниҳоятда муҳим. Мана яқинда футзал бўйича миллий терма жамоамиз Вьетнамдаги Осиё чемпионатида иккинчи ўринни олиб қайтди. Лекин термамиз келганидан кейин ҳам бош мураббий ва қайсидир ўйинчи иштирокида матбуот анжумани ўтказилмади.

Тўғрисини айтганда, бунинг айбдори ЎФФми ёки Терма жамоалар марказими, аниқ гап айтиш қийин. Лекин қарс икки қўлдан чиқади деганларидек, ҳар икки томондан ҳам камчилик ўтган бўлиши мумкин. Гапираман десангиз, камчиликлар бисёр. Шуҳрат Мақсудов олимпия терма жамоамизга, Сергей Лушан Алексей Евстафеев ўрнига ёшлар терма жамоамизга бош мураббий этиб тайинланганига анча бўлди. Лекин бу икки мураббий ҳам халққа расман таништирилгани йўқ. Натижада журналистлар ундан-бундан суриштириб ёзиб юришибди.

Кечаги баҳсда кўрсатган хизмати учун “Олмалиқ” футбол клуби матбуот котиби Бахтиёр Шириновга алоҳида раҳмат. Чунки анчадан бери терма жамоамиз ўйинларида махсус “програмкалар” чоп этилганини кўрмагандик. Аммо Бахтиёр ака шуни уддалабдилар. Мана энди “Жар”даги баҳс тўлиқ ЎФФ назоратида бўлади, уч нафар футболчининг терма жамоа билан хайрлашиши кутиляпти. Шундай экан, ЎФФ матбуот хизматидан ҳам ОАВ ходимлари учун нимадир қилишни кутиб қоламиз.

Кечаги ўйинни кўриш учун Тошкентдан ўнлаб журналистлар Олмалиққа боришди. Сайтимиз ходимлари Нодирхўжа Юлдашев, Камолиддин Алимов, Шахбоз Беғамовдан ташқари бошқа ОАВда фаолият юритаётган Улуғбек Мирзаев, Норбек Ниёзов, Бобомурод Абдулла, Фарҳод Норбўтаев, Даврон Файзиев, Баҳодир Мирзаев каби ҳамкасбларимиз ҳам ўйинни кўриш мақсадида боришган экан. Бундан ташқари, Олмалиқнинг ўзидан маҳаллий журналистлар келишди. Хуллас, кўпчиликни ташкил этдик. Аммо терма жамоанинг ўйини бўла туриб учрашувдан кейин матбуот анжумани ўтказилмади. Натижада ўйиндан олдин мадҳия янграгани, стадионда сухандон ишлаганини ҳисобга олмаганда беллашув гўёки қишки йиғин пайтида клубларимиз ўтказадиган назорат баҳсига ўхшаб қолди.

Хайрулла Холиқов.