Карло Анчелотти: “Реал” мени ҳайратда қолдиришда давом этмоқда”

“Мен “Реал” клубига бефарқ бўлмаган инсонларни катта ғалаба билан табриклайман. Йигитлар ажойиб ўйин намойиш этишди. Агар ҳамма майдонда бирдек тер тўкса ва жамоангизда индивидуал маҳорати юқори футболчилар бўлса, табиийки, натижа бугунгидек ижобий кринишда бўлади.

Биз бугунги ўйин олдидан стандарт вазиятларга катта эътибор қаратдик ва бунинг устида машғулотларда ишладик. “Бавария”нинг айнан жарима майдончаси ичида бу борада муаммолари борлигини билар эдик.

Рамос ўзи ва жамоаси учун ажойиб мавсумни ўтказяпти. Айни пайтда уни дунёнинг энг яхши ҳимоячиси, дея оламан. Менга ҳимоячиларимизнинг бехато ўйини ва ўз вақтида ҳужумга қўшилиши маъқул келди.

Мен аввал ҳам Мюнхенда ғалаба қозонганман. Бугун буни яна бир бор такрорладик. Бу энг муҳим жиҳат эмас. Муҳими, “Реал” 12 йиллик танаффусдан сўнг, ниҳоят, ушбу нуфузли турнирнинг финалида ўйнайди. Лиссабондаги ягона ўйинда майдонга чиқиб, бошлаган ишимизни якунлаб қўйишимиз керак.

Очиғи, финалда ким билан тўқнаш келишни ўйламаяпман. “Челси” тажрибали жамоа. “Атлетико” эса бундай катта турнирдаги ғалабаларга чанқоқ клуб. Биз энди финалдамиз, рақиб қайси жамоа бўлишининг эса фарқи йўқ”, - дейди италиялик мутахассис.