Камо Газаров: "Бухоро" ва "Бунёдкор" ўртасидаги ўйин шиддатли ўтади"

"Ёшлар лигасида турнир жадвалидаги пешқадамга қарши баҳс олиб бордик. Йигитларимиз яқиндагина Бекободда яна бир кучли рақиб билан ўйнаб келишди. Футболчиларимиз дам олишлари учун жуда оз вақт бўлди, шу сабабли бугун уларда чарчоқ аломатлари сезилиб турди.

Бугунги учрашувда асосий марказий ҳимоячимиз дисквалификация туфайли бизга ёрдам бера олмади, шу сабабли тезкор гол ўтказиб юбордик ва дастлабки бўлимни 0:2 ҳисобида якунладик. Иккинчи бўлимда футболчиларимиз ўзларига келиб олишди ва характер намойиш эта олишди. Кетма-кет иккита тўп киритиб ҳисобни тенглаштириб олгандан кейин яна голли вазиятларни вужудга келтирдик, афсус ғалаба қозонишимиз учун озгина вақт етмади. Футболчиларимизга бугунги ўйин учун раҳмат айтаман.

Эртага асосий таркиб футболчилари ўртасида кечадиган баҳсда бундан-да шиддатли футбол гувоҳига айланамиз. Ушбу учрашувда "Бухоро"га ғалаба рақибларга нисбатдан зарурроқ. Эртанги ғалаба бухороликларни совринли ўринлар учун курашиш имкониятини беради. Футболчиларимиз ўйин қиймати нечоғлик баланд эканлигини тушуниб туришибди, барча ўйинга шай ҳолатда. Насиб қилса эртага "Бухоро" ғалаба қозона олади", - дейди Камо Газаров.

"Бухоро" матбуот хизмати