Жисмоний тарбия ва спорт вазирлиги барча вазирлик, идора ва ташкилотларнинг марказий аппарати ходимларини соғлом турмуш тарзига чорлайди

Маълумки, Ўзбекистон Республикаси Президенти томонидан 2018 йил 20 сентябрь куни жисмоний тарбия ва спорт соҳасини ривожлантириш масалаларига бағишлаб ўтказилган йиғилиш, қолаверса 2019 йил 19 март куни ўтказилган “Ёшлар билан ишлашни самарали ташкил этишда маданият, санъат, спорт, ахборот технологиялари, китоб ўқишга қизиқишини ошириш бўйича 5 та муҳим ташаббусни амалга ошириш тўғрисида”ги видеоселектор йиғилишида белгилаб берилган устувор вазифалар ижросини таъминлаш мақсадида вазирлик, идора ва ташкилотлар миқёсида спортни кенг оммалаштириш чора-тадбирлари амалга ошириб келинмоқда.

Жумладан, Ўзбекистон Республикаси Жисмоний тарбия ва спорт вазирлиги ташаббуси билан жорий йилнинг октябрь-ноябрь ойларида барча вазирлик, идора ва ташкилотлар (ҳуқуқни муҳофаза қилиш органларидан ташқари)нинг марказий аппарати ходимлари ўртасида футбол ва волейбол бўйича “Мустақиллик кубоги” спорт мусобақаларини ташкил этиш ва ўтказиш режалаштирилмоқда.

Лойиҳага кўра эркаклар футбол мусобақаларида, аёллар эса волейбол мусобақаларида ғолиблик учун ўзаро баҳслашади. Мусобақа Низомига кўра иштирокчиларнинг ёши чегараланган, яъни мусобақаларда фақат 30 ёш ва ундан юқори бўлган ходимлар қатнашиш ҳуқуқига эга.

Мусобақанинг финал босқичи спорт байрами тарзида ташкил этилиб, якунда барча ғолиб ва совриндорлар ташкилотчилар томонидан қимматбаҳо эсдалик совғалари билан тақдирланади.

Жисмоний тарбия ва спорт вазирлиги матбуот хизмати