Жавоҳир Сидиқов: "Финалда камбэк қайд этиш осонмас"

"Ҳар қандай турнирнинг ҳал қилувчи учрашувига тайёргарлик ўзгача бўлади. Чемпионат ўйинида шунчаки ғалаба учун майдонга тушсак, Суперкубокда ундан юз чандон кўпроқ иштиёқ билан тайёрлангандик. Ғалабадан кейинги ҳиссиётларимни сўз билан ифодалай олмайман. Жуда хурсандман. Кубокни Қарши шаҳрига олиб кетишни хоҳлагандик. Бизни қўллаб-қувватлаган мухлисларга миннатдорчилик билдираман. Шунингдек, клубда меҳнат қилаётган барча ходимларга раҳмат айтмоқчиман. Ғалабада барчанинг ҳиссаси мавжуд. 

Учрашувга нафақат жисмонан, балки руҳан тайёр эдик. Шу боис, ғалабани ўз тарафамизга оғдира олдик. Финалда камбэк амалга оширишнинг ўзи бўлмайди. Айниқса, "Пахтакор"дек кучли жамоага қарши ўйинда бунга эришиш қийин. Бироқ биз буни уддаладик. Энди Суперлига ва Осиё Чемпионлар лигасида ҳам ўзимиз истаган натижага эришиш учун боримизни берамиз", деди "Насаф" ярим ҳимоячиси.