Жавоҳир Илёсов - "Металлург" билан ўйин, тайёргарлик ва энг яхши кўрган дарвозабони ҳақида

- "Металлург"га қарши ўйиндан олдинги фикрларингиз билан ўртоқлашсангиз...
- "Металлург" билан яхши ўйин бўлади. Нафақат "Металлург", балки, бошқа жамоалар билан ўтган ўйинлар ҳам қийин ўтди. Навбатдаги учрашувлар ҳам мураккаб ўтиши аниқ. Суперлигада оддий баҳслар ўтмаяпти. "Металлург" яхши жамоа, уларга қарши ўтадиган баҳсга яхши тайёргарлик кўряпмиз. Гарчи ОЧЛда мағлубиятга учраган бўлсак-да, жамоадошларимнинг кайфияти яхши ҳолатда.

- "Локомотив"га ўтиш ҳаётингизда нималарни ўзгартирди?
- "Локомотив"га ўтишим фаолиятимда катта ўзгаришларга олиб келди. Чунки барча футболчилар чемпион жамоада ўйнаш ёқимли. Мен ҳам ёшлигимдан чемпион жамоа таркибида ўйнашни мақсад қилгандим. Орзуларимга эришяпман. Энди келгусида яхши ўйинлар кўрсатиб, "Локомотив" мухлисларини хурсанд қилмоқчиман.

- Қайси дарвозабоннинг ўйинларига мухлиссиз?
- "Тоттенхэм" ва Франция термаси дарвозабони Уго Льориснинг ўйинлари менга ёқади. Ҳар доим унинг ўйинларини кўриб, ундан ўрганишга ҳаракат қиламан.

- Нега айнан дарвозабонликни танлагансиз? Дарвозабон бўлишга сизни нима ундаган?
- Ёшлигимдан кўриб, дарвозабонликка қизиққанман. Ёшлигимда Икер Касильяснинг ўйинларини кузатиб юриб, кўчаларда, асфальтларда футбол ўйнаб, оёқлар шилингунча тўп тепардик. Кейинчалик футбол мактабига бордим ва аста-секин улғайиб, орзуларимга эришмоқдаман.