Жасур Жалолиддиновни "Беневенто" жамоасида кўришни ким истамоқда?

Суперлиганинг 24-тури доирасидаги "Навбаҳор"га қарши ғалабали ўйиндан кейин "Бунёдкор" бош директори Жасур Жалолиддиновнинг трансфери бўйича эксклюзив маълумотни берди.

- "Жорий мавсумда ёрқин ўйинлари билан кўпчиликда илиқ таассурот қолдирган Жасур Жалолиддинов декабрда Италияга йўл олади. Италия Б Серияси пешқадами бўлиб турган "Беневенто" жамоаси Жалолиддиновга қизиқмоқда. Жасур Жалолиддиновни "Беневенто"да кўришни шахсан жамоа бош мураббийи Филиппо Инзаги истаган. Яқинда Президентимизнинг футболга оид фармони лойиҳалари эълон қилинди. Фармонда кўплаб иқтидорли ёш футболчиларни тарбиялаб, уларни Европа бозорига экспорт қилиб, шу орқали терма жамоаларимизни кучайтириш вазифалари киритилган. Шу фармон йўлида биз Жасур Жалолиддиновни трансфери учун катта пул сўрамасдан, Европага йўл очилгани туфайли "Беневенто"га қўйиб юборамиз. Италияликларнинг таклифига кўра, шартнома ҳозир имзоланади ва келаси йили июль ойидан расман кучга киради. Чунки Жасур Жалолиддинов ҳозир 17 ёшда ва ҳали 18 ёшга тўлмаган. Агарда "Беневенто" жорий мавсум якунига кўра ўз мақсадига эришиб, кучли учликда қолса, унда келаси мавсумдан эътиборан ўзбек футболчиси яна Италия А Сериясида ўйнаши мумкин бўлади", - деди Улуғбек Мирзаев.

Эслатиб ўтамиз, "Беневенто" айни пайтда Б Серияда 13-турдан кейин 28 очко жамғарган ҳолда турнир пешқадами бўлиб турибди. Б Серияда дастлабки 3 ўринни эгаллаган жамоалар А Серияга йўлланма олишади.

"Беневенто" жамоаси бош мураббийи сифатида эса италиялик машҳур ҳужумчи Филиппо Инзаги ишламоқда ва айнан Пиппоголга Жалолиддиновнинг ўйинлари маъқул келгани туфайли мазкур трансфер амалга ошиш бўсағасида.