Жамшид Саидов: "Ўйин ҳақида гапиришни истамайман"

"Ўйин ҳақида ҳеч нима демоқчи эмасман. Шунчаки рақибимизни ғалаба билан табриклайман", - дея фикр билдирди Жамшид Саидов.

- Асосий дарвозабон Робертс Озолс бугун қайдномадан ўрин олмади. Бу ҳолат "Металлург"га қарши кечган ўйинда жароҳат олгани билан боғлиқми? Асосий дарвозабон ҳали сафга қайтмадими?

- Ҳа, унда жароҳат бор. У эндигина сафимизга қўшилди.

- Бугунги учрашув жамоангиз учун қўйи поғоналардан узоқлашиш учун яхши имконият эди. Тўғри, "Олимпик" ёш ва курашувчан жамоа, лекин ушбу жамоа анча вақтдан буён ғалаба қозонмаётганди. Бугун "Қизилқум" ҳар доим намойиш этадиган жанговар ўйинни кўрмадик. Бунга сабаб нима бўлди?

- Футболчилар ҳар бир учрашув қандай катта аҳамиятга эга эканлигини билишади. Афсуски, бугун биз яхши ўйин намойиш эта олмадик. Шу сабабли ўйин ҳақида ҳеч нимани гапиришни истамайман. Ўйинни назорат қилдик ва тўпга эгалик қилдик, аммо қарши ҳужумда гол ўтказиб юбордик. Иккита қарши ҳужумда иккита тўп ўтказиб юбордик, аммо бор-йўғи битта гол ҳисобланди.

- Чемпионат якунига қадар бешта баҳс қолди. Кейинги учрашув "Пахтакор"га қарши кечади. Нима деб ўйлайсиз, яна неча очко жамоангизни Суперлигада жон сақлаб қолиши учун етарли бўлади?

- Ҳали ўйинлар кўп. Олдиндан бир нарса дейиш қийин. Вақт барчасини аниқлаб беради.