"Жамоа Про лигага тушиб кетганда кўп ёшлар кўчада қолиб кетганди. Фузайловга фақат омад тилайман" ёхуд "Бухоро" футболчиси учун кейинги манзил қаер?

Жамоани ярим ҳимоячи Бекзод Саидов (расмда 19-рақам – таҳр.) тарк этди. Унинг кейинги режалари билан қизиқдик. 

- "Бухоро"ни тарк этишингиз сабаби нимада? Жароҳат ёки бошқа омилларми?

- Ўйин амалиёти етарли бўлмади. Бор гап шу. 

- Жамоа элитага қайтди. 2020 йил "Бухоро"ни Про лигага тушиб кетиши ёш ўйинчиларга қай даражада салбий таъсир қилди?

- Кўп ёш футболчилар кўчада қолиб кетди. Янги мавсумда эътибор янада яхши бўлади, деб ўйлайман. 

- Суперлигага қайтишда нима кўпроқ роль ўйнади?

- Яхши таркиб йиғилганди ва ички муҳит аъло даражада эди. Барча футболчилар майдонга жонини берди. 

- Ҳаким Фузайлов ҳақида фикрингиз қандай? Мураббий билан гаплашиб олдингизми?

- Албатта, у киши билан гаплашиб олганман. Ҳаким Қаюмович яхши мураббий, икки йил ичида иккита жамоани Суперлигага олиб чиқди. Янги мавсумда фақат омад тилайман. 

- Бекзод Саидов учун навбатдаги манзил қайси жамоа бўлади?

- 1-2 та жамоалардан таклифлар бор. Ҳозирча сир сақлаганим маъқул. Балки Про лига ёки Суперлигада ўйнашим мумкин. Буни вақт кўрсатади.