Жалолиддин Машарипов: "Пахтакор"да айни пайтда ички муҳит жуда яхши"

Биз эса "Пахтакор" машғулоти якунланганидан сўнг жамоа вингери Жалолиддин Машариповнинг фикрлари билан қизиқдик.

Видео: "Пахтакор"нинг 15 февралдаги машғулоти

"Ўтган учрашувдаги ғалабани тезроқ унутиб, бор эътиборни "Ал Наср"га қарши бўлажак учрашувга қаратишимиз лозим. ОЧЛ гуруҳ босқичига йўлланмани нақд қилиш лозим. Мавсумни финалга тенг ўйин билан бошладик. "Ал Наср"га қарши баҳс ҳам бунданда қийматлироқ беллашувга айланади. Мазкур ўйинга жамоамиз тайёр. Асосийси, яхши кайфиятда муҳим ўйинга тайёргарлик кўряпмиз. Ғалаба бизга янада ишонч бағишлади.

Албатта урган голимдан янада руҳландим. Ўз кучимга бўлган ишончим ортди.

Рақиб ҳақида? Аста-секинлик билан "Ал Наср" жамоасини ўрганиб, уларни ўйинлари таҳлили бошланди. Мураббийлар штаби бунгача "Эйр Форс" жамоасини чуқур ўрганиб, уларнинг кучли ва кучсиз тарафларини кўрсатишганди. Энди эса "Ал Наср" жамоасини ўрганиш жараёни бошланди.

Ички муҳит? Ўтган йили айнан шу жиҳат бироз яхши эмаслиги панд берганди. Бу йили эса футболчилар билан йиғилиб, ўзаро гаплашиб олдик. Барчамиз бир жойдан нон топамиз, шу боисдан ҳам ўзаро келишиб олганмиз. Айни пайтда ички муҳит жуда ҳам яхши.

Биринчи баҳсда мухлислар стадионда ажойиб муҳит яратишди. Уларнинг кўмаги ва қўллаб-қувватлови бизга куч беради. Шу ўринда биринчи баҳсдаги ажойиб мухлислик учун уларга ташаккур. "Ал Наср"га қарши ўйинда ҳам телеэкран қаршисида бизни қўллаб-қувватлашдан чарчамасликларини тилаб, уларни хурсанд этишга ҳаракат қилишимизни айтиб ўтмоқчиман. Мухлислар бизни ёлғизлатиб қўйишмаса, аксинча қўллаб-қувватлаб туришса биз янада кучлироқ жамоага айланамиз", - дея ўз фикрлари билан ўртоқлашди Жалолиддин Машарипов.

Юқори кайфиятли Сайфиев, ҳаводаги Қувватов ва "калтакланаётган футболчилар". "Пахтакор"нинг бугунги машғулоти (ФОТОГАЛЕРЕЯ)

Эслатиб ўтамиз, "Пахтакор" 12 февраль куни ОЧЛ 2-саралаш босқичи доирасида Ироқнинг "Эйр Форс" клубини (2:1) мағлуб этди ва ОЧЛ плей-офф босқичида энди амирликларнинг "Ал Наср" жамоасига қарши саф тортади.

Қайд этиш керак Тошкентнинг "Пахтакор" жамоаси бугун эрталаб Тошкент-Дубай йўналиши орқали Бирлашган Араб Амирликларига етиб борди. Шота Арвеладзе бошчилигидаги жамоа Дубайдаги илк машғулотини бугун маҳаллий вақт билан соат 19:30да, Тошкент вақти бўйича 20:30да бошлайди.