Искандар Мўминов: "Ёзёвон" ҳурматга лойиқ жамоа"

Ўйин жуда қийин бўлди. Биз комбинацион ўйин намойиш этамиз. Аммо бундай майдонда нимадир яратиш қийин, фақат рақиб ҳужумини бузиш мумкин. 13 соатли йўл босиб келдик ва дарҳол майдонга тушдик. Таркибимизда кўп футболчилар сариқ карточкалари тўпланиб қолгани боис бу баҳсга кела олишмади. Шу боис захирасиз ўйнадик. Ютқазиб қўйишимиз ҳам мумкин эди, ҳисобга қарамаслик керак. Натижа ўйинга мос бўлмади. Сабаби "Ёзёвон" кўп ҳужум қилди. Бу жамоа ҳурматга сазовор. "Ёзёвон" ҳакамнинг сўнгги ҳуштаги чалингунига қадар ўйнади ва кўплар вазиятлар яратди. Сафардаги қийин ўйинда 3 очко олганимиздан хурсандман.

Бизнинг мақсадимиз битта - "А" гуруҳига чиқиш. У ерда биринчи ўринга курашиш ва Суперлигага чиқишни мақсад қиламиз. Бу гапни клуб президенти Маъмуржон Отақулов кўп бор такрорлайди. У футболни жуда яхши кўради. У киши "Ғиждувон" клубини ўз ҳисобидан молиялаштиради. Маъмуржон Отақулов 2022 йилда жамоани Суперлигада кўрмоқчи.

Бекзод Толибов ёзиб олди.