Илёс Зейтуллаев: "Самарқанддаги 3 очкони жамоавий ғалаба деган бўлардим"

"Биринчи навбатда самарқандлик мухлисларга миннатдорчилик билдираман. Улар бугун ажойиб муҳит яратишди, мухлислар билан тўлган аренада ўйнаш футболчиларга икки ҳисса куч бағишлайди. Шу ўринда жамоамни ҳам олқишламоқчиман. Йигитлар борларини беришди, бу мавсумдаги энг яхши биринчи бўлимимизни ўтказдик. Биз янада олдинга интилишимиз керак. Жароҳатланганлар бор, улар тикланиб олиши зарур",- дейди Илёс Зейтуллаев.

- "Бунёдкор" хатосиз ўйнади, ўйинни назорат қилди. Рақибни яхши ўрганган эдингизми ёки ўйиннинг бориши шундай кечдими?

- Ҳар бир рақибни ўрганамиз. Самарқандда ўтган йили ҳам ўйнагандик. Жамоа тўпни назорат қилишни яхши кўради. Ҳимояда ҳам яхши ҳаракат қилади. Абрамов тажрибали мураббий, чиройли ўйин йўлга қўйган. Темурхўжа Абдухолиқов катта ҳажмдаги ишни бажарганини ҳам айтиб ўтиш жоиз. Ўйлайманки, у бундан ҳам яхши ўйин кўрсата олади. Луис Качоррига келсак, у захирада қолди. Бу сафар шундай танлов қилдик. Буни жамоавий ғалаба деган бўлардим.