Илёс Қурбонов: "Насаф"га қарши очиқ футбол ўйнаб бўлмайди"

Ўйин ҳақида

- Йигитларга миннатдорчилик билдираман, улар бугун майдонда борларини беришди. Рақиб ҳақида биламиз, ўрганиб ҳам чиққандик. Ўзбекистондаги энг кучли жамоалардан бири. Қарши ҳужумда ўйнашни мақсад қилгандик. Вазиятларимиз бўлди, фойдалана олмадик. Ёмон ўйин бўлмади деб ўйлайман.

- "Насаф" билан ўйин олдидан берилган кўрсатмаларни жамоа футболчилари қанчалик амалга ошира олишди?

- Айтиб ўтганимдек, йигитлар берилган кўрсатмаларни яхши бажаришди. Зич ўйнаб, қарши ҳужумлардан фойдаланишни мақсад қилгандик. Вазиятларимиз бўлди. Ўтган ўйинда ҳам шу каби услубда ўйнагандик. "Насаф" билан ўйинда очиқ футбол ўйнаш қийин эди.

- Сўнги дақиқаларда "Насаф" катта куч билан олдинга чиққани ҳисобига жамоангиз қарши ҳужумларида вазиятлар бўлди. Мана шу вазиятлардан фойдаланишга нима етишмади деб ўйлайсиз?

- Машғулотларда қарши ҳужумларда ишлагандик. Бундай услубда биринчи узатманинг аҳамияти жуда юқори бўлади. Бизга мукаммал узатма бера оладиган ижрочи етишмади. Ўзаро тушунмовчилик юзага келди.

- Забихилло Ўринбоев қачон сафга қайтади?

- Забихилло шу ҳафтанинг охирида сўнги кўрикдан ўтади ва умумий гуруҳ билан машғулотларга қайтади. Иккинчи давра бошиданоқ сафимизга қайтишидан умид қилаяпмиз.