Илҳом Мўминжонов: "Бугун футболчиларим "Шўртан"ни "ўйиндан олдин ютиб" майдонга тушишди"
22 апр 2021 21:37
Новости

Илҳом Мўминжонов: "Бугун футболчиларим "Шўртан"ни "ўйиндан олдин ютиб" майдонга тушишди"

Ўзбекистон Coca-Cola кубоги мусобақасининг гуруҳ босқичи 1-туридан ўрин олган "Шўртан" - "Нефтчи" (1:0) учрашувидан сўнг меҳмонлар бош мураббийи Илҳом Мўминжонов матбуот анжуманида иштирок этди.

Ўйин ҳақида

- Бугун мағлубиятга учрадик. Футболчилар рақибни "олдиндан ютган" ҳолда майдонга чиқишди. Ҳар қандай рақибни ҳурмат қилиш керак. Ўзларинг кўрдинглар, бугунги ўйинда биронта хавфли вазият ҳам бўлмади. Бу мағлубиятдан сўнг тўхтаб қолмаймиз.

Бугун Про-лиганинг 5 та тури давомида ўйин амалиётига эга бўлмаган футболчиларни майдонга туширгандик. Лекин улар ҳам тажрибали, маҳоратли футболчилар ҳисобланишарди. Бугун ютқазишга ҳаққимиз йўқ эди. Олдинда иккита ўйинимиз бор, бу учрашувларда ғалаба қозониб кейинги босқичга чиқишга ҳаракат қиламиз.

- "Шўртан" бугун мавсумдаги илк ғалабасини кучли рақиб устидан қўлга киритди. Бугунги мағлубиятни қандай изоҳлайсиз?

- Айтиб ўтдим, бугун йигитлар "ўйиндан олдин рақибни ютиб" майдонга тушишди. Рақибга ҳурмат билан қарамаганимиз панд берди. Биз ўйиндан олдин футболчиларга юқори прессингда ўйнаш, позицион ҳужумлар ташкил этиш ва стандарт вазиятларда ҳушёр бўлишларини таъкидлаган эдик. Бугунги ўйинга руҳият ҳам таъсир кўрсатди. Рақибга нисбатан ҳурмат билан қарамаганимиз эвазига мағлуб бўлдик. Мураббийлар штаби билан хатолар устида ишлаймиз.