Икром Алибоев: "Локо"нинг вазифаси - чемпионлик. Менинг асосий мақсадим - "кучли бешлик"ка йўл олиш"

"Жамоамиз билан иккинчи даврага тайёргарликни Австрияда олиб бордик. Ҳаммаси режа асосида ўтди. У ерда тўртта назорат учрашуви ўтказдик. Барча ўйинларда қатнашдим. Жароҳатимдан фориғ бўлдим. Иккинчи давра ўйинларида майдонга қайтаман", - дея гап бошлади Икром Алибоев.

- "Локомотив" иккинчи даврада пешқадамликни ўз қўлига олишига ишонасизми?

- Буни ҳаммасини вақт кўрсатади. Бизнинг мақсадимиз доимо биринчи ўринни қўлга киритиш. Бу мавсумда чемпионликни қўлга киритишни истаймиз. Иккинчи даврадаги барча беллашувларни ўз фойдамизга ҳал этишга ҳаракат қиламиз.

- Ўзбекистон Кубогининг ярим финал баҳсидаги рақибларингиз "Насаф" бўлади. "Локомотив" ушбу тўсиқдан ўта оладими?

- Финалга йўл олишимизга ишонамиз. "Насаф" жуда ҳам кучли жамоа. Қаршиликларда жамоавий ўйин жуда яхши йўлга қўйилган. Деярли барча футболчилари 5-6 йилдан буён бирга ёнма-ён тўп тепишмоқда. Биз эса ўтган йилги натижамизни такрорашга уриниб кўрамиз.

- Сизга бошқа жамоалардан таклифлар бўлдими?

- Ҳеч бир жамоа шахсан менга таклиф билан чиққани йўқ. Балки жамоага бу борада таклифлар бўлгандир. Бу борада хабардор эмасман. Бу масалада ҳаммасини клуб ҳал қилади. Ўзбек футболчиларининг биринчи мақсади европада тўп тепиш. Ўзимга келадиган бўлсак, менинг асосий мақсадим европанинг ўртамиёна чемпионатида эмас, балки кучли бешлик жамоаларининг бирига ўтиш.


Шаҳбоз Беғамов суҳбатлашди.