Игорь Сергеевга Россия, Польша, Жанубий Кореядан аниқ таклифлар бор
18 дек 2021 15:12
Новости

Игорь Сергеевга Россия, Польша, Жанубий Кореядан аниқ таклифлар бор

Ўзбекистон миллий терма жамоаси ҳужумчиси Игорь Сергеев фаолиятини қайси мамлакатда давом эттиради?

Якунланган мавсум "Тобол" сафида Қозоғистон чемпиони бўлган Игорь Сергеев айни пайтда эркин агент бўлиб турибди.

Championat.asia сайти маълумотига кўра, Сергеевга Россиянинг "Химки" клуби жиддий қизиқиш билдирган. Бу борада аниқ маълумот олиш учун футболчининг агенти Рўзимурод Усмоновга мурожаат қилдик:

"Бугунги кунда Игорь Сергеевга "Химки" клубидан қизиқиш бўлаётгани рост, аммо бу вариантни фаворит танлов дейиш қийин. Ҳужумчига Польша ва Жанубий Корея клубларидан аниқ таклифлар бор. Қатар масаласида иш олиб борилмоқда. Тез орада энг мақбул вариантни танлаймиз", - дейди Сергеевнинг агенти championat.asia сайтига.

Маълумот учун, Сергеев Қозоғистон чемпионатида 11та гол уришга эришди. Тўпурарлар пойгасида ҳамюртимиз учинчи ўринни эгаллади. Ҳамюртимиз Transfermarkt талқинига кўра, Қозоғистон чемпионатининг 2021 йил учун рамзий жамоасидан ўрин олди.

Қуйида Игорь Сергеевнинг 2021 йилдаги голлари жамланган видеони томоша қилиш мумкин: