Ҳакамлар "Манчестер Юнайтед"нинг зарарига икки марта қўпол хатога йўл қўйганини тан олди

Лиганинг сўнгги жамоаси бўлиб турган "Шеффилд" "Олд Траффорд"да ғалаба қозониб кетди. Ўйиндан кейин Оле-Гуннар Сульшер ва Харри Магуайр ҳакамликдан нолиди: арбитр Питер Бэнкс Антони Марсьялнинг голини инобатга олмади, бу паллада Магуайр дарвозабонга ҳужум қилганликда айбланди. Ўз навбатида ҳакам "Шеффилд"нинг илк голи урилган вазиятда Билли Шарпнинг Давид Де Хеага ишлатган қўполлигини кўрмади.

"Ғалати. Шак-шубхасиз, Билли Шарп ҳам мен каби фол ишлатди. Балки кимлардир иккала ҳолатда ҳам фол йўқ деб ҳисоблар. Аммо икки вазиятни бир-биридан ажратиб бўлмайди", - деди Магуайр. Сульшер ҳам бу фикрга қўшилмоқда: "Биринчи эпизод? Фол. Иккинчи эпизод? Фол эмас".

Улар ҳақ бўлиб чиқишди. Душанба куни Сульшер ҳакамларнинг ҳисоботини қабул қилиб олган ва унда улар МЮнинг голини инобатга олиб, "Шеффилд"никини бекор қилиш керак бўлганлигини ёзиб қўйишган. Англияда доимий равишда ҳакамлар клубларга ҳисобот беришади, бироқ бу халққа маълум қилинмайди.

"Бу биз учун муҳим вазият эди. 0:1 ҳисобида ютқазаётганингизда эмас, 1:0 ҳисобида олдинда бораётган бўлсангиз, Сизда ўйинни ютиш имконияти кўпроқ бўлади", - деб қўшиб қўйди Сульшер.

Келинг, яна бир бор бу икки вазиятни баҳолаб кўрамиз.

"Шеффилд"нинг голи, 23-дақиқа: Бурчакдан тўп оширилди, Де Хеа тўпни уриб юборишга ҳаракат қилмоқда, бироқ Брайан тўпга сакраб, гол урди. Бу паллада Билли Шарп шунчаки дарвозабонга ҳалақит қилди ва ортидан итариб юборди.

Мана бу ракурсдан фол бўлгани кўриниб турибди. Ёки сиз Де Хеа курашда мағлуб бўлмоқда деб ҳисоблайсизми?

Марсьялнинг бекор қилинган голи, 30-дақиқа: Бурчакдан тўп оширилмоқда, футболчи ва дарвозабон ўртасида тўп учун кураш, бироқ бу ерда Магуайр Аарон Рэмсдейлга қарши фол ишлатди деб ҳисобланди.

Рэмсдейл тўпни ушлай олмади ва Марсьялга бориб тушди. Унинг голидан кейин ҳакам хуштак чалиб, фол бўлганини қайд этди. "Мен тўпга сакрадим. Дарвозабонга текканимни сезмадим ҳам. Унинг ўзи белимга урилди. Қўлларим ҳам унга яқин эмасди", - деди Магуайр.

Хўш, сиз бунга қандай фикрдасиз?