Футзал. Шуҳрат Пўлатов: "Футзалда ҳам автогол инобатга олинади"

Қитъа биринчилигида гуруҳ баҳслари ўз якунига етгач, ҳакамимиздан айрим саволларга жавоб олдик.

- Осиё чемпионатида автоголлар ҳисобга олинмоқда, Ўзбекистон чемпионатида нима учун автогол инобатга олинмайди?
- Футзалда ҳам, ҳудди катта футболда бўлгани каби автоголлар ҳар доим инобатга олинади. Ички чемпионатимизда автогол ҳисобланмаслиги бу қайсидир маънода ички муаммо деса ҳам бўлади. Бизда аввалдан шундай, ҳозирча бу борада аниқ фикрга келинмаган.

- Автоголни инобатга олинмаслиги ҳақида Ўзбекистон чемпионати регламентида ёзилганми?
- Йўқ, бу ҳақда ҳеч нарса ёзилмаган.

- Футзал қоидаларида бу ҳақда нима дейилган?
- Футзал қоидаларида автогол ҳамиша инобатга олинади деб ёзилган.

- Вьетнамдаги мусобақада ҳакамлар учун яратиб берилган шароитлар қай даражада?
- Бу ерга келган ҳакамлар учун барча шароитлар яратиб берилган, ҳаммаси профессионал даражада деб айта оламан.

Толибжон Қосимов суҳбатлашди