Футзал. АГМК – "Нефтчи" учрашувидан сўнг мураббийлар фикрлари

Куннинг иккинчи учрашувида АГМК ва "Нефтчи" клублари ўзаро тўқнаш келдилар ва учрашувда олмалиқликлар 7:0 ҳисобида ғалабага эришишди. 

Қуйида ўйин якунида ҳар икки жамоа мураббийлари томонидан билдирилган фикрлар эътиборингизга ҳавола этилади.

Фарруҳ Зокиров ("Нефтчи" бош мураббийи): "Жамоамиз ушбу мавсумдан Олий лигада қатнашиш ҳуқуқини қўлга киритди. Таркибда асосан, маҳаллий футзалчилар жам бўлган. Улар ўйинлар давомида тажриба тўплаб боришади. Мақсадимиз – асосан, водий вилоятларидан бўлган маҳаллий ёш футзалчиларни ҳам Олий лигада ўйнаш олишларини кўрсатиш. Бугунги ўйинни ёмон бошламадик. АГМК номдор жамоа эканлиги йигитларни бир оз ҳаяжонга солди. Гувоҳи бўлдикки, ҳар қандай жамоа билан тенгма-тенг ўйнаса бўлади. Олдиндаги ўйинларга жиддий руҳда тайёргарлик кўрамиз".

Александр Петров (АГМК бош мураббийи): "Аввало, фарғоналикларни ажойиб залга эга бўлганликлари билан табриклайман. Бундай ареналарнинг кўпайиши футзал ривожига ҳисса қўшади. Ўзбекистон терма жамоасининг 6 наъфар азоси АГМКни тарк этди. Тактик ишланмаларни йўлга қўйиб, юқори мақсадлар сари интиламиз. Мезбон жамоа таркиби ёшлардан иборат, уларга келгусида омад тилайман. Раҳбарият эътибор қаратса, ишонаманки, жамоа албатта, ўз ўрнини топиб кетади ва кучаяди".