Фарруҳ Сайфиев: “Карантиндан сўнг “Пахтакор”ни оғир тақвим кутмоқда”

Карантиндан сўнг ички чемпионатимизда тиғиз тақвим юзага келиши табиий. Айниқса, халқаро майдонда юртимиз шарафини ҳимоя қилувчи “Пахтакор” жамоасини оғир учрашувлар кутмоқда. Биз бу борада “шерлар”нинг махоратли футболчиси Фарруҳ Сайфиевнинг фикрлари билан қизиқдик.

“Карантиндан сўнг бизни осон бўлмаган мавсум кутмоқда. Ҳар уч ёки тўрт кунда ўйинлар ўтказилиши бир томондан фойдалироқ. Бу эса ўз ўйинимизни тезроқ топиб олишимизга катта ёрдам беради. Ўтган йили барча мусобақаларда ғолиб чиқдик ва требл қайд этди. Буларнинг барчаси ортда қолди. Эндиликда янги марраларни забт этишими, янада олдинга интилишимиз керак. Чунки, олдинги ғалабалар ва совринлар энди тарих. Жорий йилда янги тарих яратишни истаймиз.

Ким жиддий рақобат туғдириши мумкин? Менимча, “Насаф”, “Бунёдкор”, “Навбаҳор” жамоалари бизга жиддий қаршилик кўрсатишларини таҳмин қилишим мумкин. Албатта, қолган жамоаларга ҳам ҳурматни сақлаб қоламиз. Оралиқдаги катта танаффусдан сўнг ўзгаришлар бўлиши турган гап. Футболчилар ҳар куни уйда машғулотларни тўхтатаётгани йўқ. Жамоадошларим ва мураббийлар билан доим алоқадамиз. Мураббийларимизнинг кўрсатмалари ва дастурлари асосида ўзимиз якка тартибда бажармоқдамиз.

Эрен Дердийок Европа ҳавосини кўрган ва тажрибали футболчи. Агарда, чемпионат бошланса янада яхшироқ чиқишиб кетади деб ўйлайман. Бизга ёрдами ва фойдаси ҳали кўп тегишига ишонаман.

Кундалик машқлардан сўнг оила даврасида дам оляпман. Бўш вақтни фойдали нарсаларга сарфлашга ҳаракат қиляпман. Карантин даврида уйда қолинг ва ўзингизни, оила аъзоларингизни эҳтиёт қилинг. Биргаликда ҳаракат қилсак коронавирусни енгиб ўтамиз. Ҳозирги вақтда муҳими соғлик ва саломатлик ҳисобланади. Чиройли ўйинлар ва ёрқин ғалабалар ҳали олдинда”,- деди Сайфиев.

Абдулазиз Искандаров ёзиб олди