Фарруҳ Пардаев: "Нефтгазмонтаж" Про лигага чиқишга мутлақо тайёр"

- "Нефтгазмонтаж" жамоасининг биринчи даврадаги иштироки ҳақида фикрларингиз қандай ? Қандай хулосалар юзага келди?

- Аввало суҳбатга таклиф қилганингиз учун ташаккур. Жамоамиз жорий йилда Биринчи лигада дебют мавсумини ўтказмоқда. Бундан жуда ҳам хурсандман. Биринчи даврадан қизиқарли таассуротлар қолди. Номдор рақибларни мағлубиятга учратдик. Шундай хулосага келдикки, бундай ғалабалардан сўнг асло бўшашиш керак эмасакан. 

- Жамоа кучли рақиблар билан ўйинда ўзини кўрсата олди. "Зомин"," Ғиждувон"ни ютди. Лекин "Лочин"," Чиғатой", "Хотира-79" каби жамоалар билан ўйинларда мағлуб бўлди. Бу борада нима дея оласиз ? 

- "Зомин" ва "Ғиждувон"га қарши учрашувлар осон ўтгани йўқ. Мазкур ўйинларда характер кўрсата олдик. Рақибдан устун келдик. Баъзи бир ўйинларда натижаларимиз кўнгилдагидек бўлмади. Муҳим уч очколарни йўқотдик. Аламли дуранглар бўлди. Мағлубиятга учраган ўйинларимизда эътибор берган бўлсангиз, вазиятлар яратиш ва ўйин борасида катта устунликка эга чиқдик. Ҳар бир ўйинда ўртача 2тадан гол урмоқдамиз. Ҳужум чизиғимиз жуда ҳам кучли, дея оламан. Шунингдек омад ҳам биздан юз ўгирди. Эндиликда астойдил ишлаймиз.

- Клуб Про лигага чиқишга қай даражада тайёр?

- Менимча, жамоа Про лигага чиқишга мутлақо тайёр. Шахсан мен клубга шу мақсадда келганман. Худо хоҳласа иккинчи даврани кўтаринки руҳда ўтказиб мураббий ва мухлисларимизни ишончини оқлашга ҳаракат қиламиз. Юқори ўринларни эгаллаб Про лигага йўлланма оламиз.

- Айни пайтда бошқа жамоалардан таклифлар борми?

- Ҳозир таклифлар бўлмади. Бор эътиборим фақат жамоамга қаратилган. Мақсад иккинчи даврани максимум даражада ўтказиш. Кейинчалик қолганини ўйлаб кўрса бўлади.

- Биринчи давранинг энг яхши ва энг ёмон ўйини қайси?

- Жамоамиз барча учрашувларни аъло даражада ўтказди. Энг ёдда қолган ўйин меҳмонда "Ғиждувон"га қарши кечди.Ушбу баҳсда мураббийларимизнинг кўрсатмаларини бажарганимиз ҳисобига ғалаба қозондик. Энг аламлиси ўз майдонимизда  "Чиғатой"га ютқазганимиз бўлса керак.