Фабрегас: "Артета фантастик ишни бажарди"

Якшанба куни Англия Премьер-лигасида "Арсенал" ва "Манчестер Юнайтед" тўқнашувида "тўпчилар" 3:2 ҳисобида устун келди. Лондон клуби ушбу ғалабадан кейин турнир жадвалидаги пешқадамлигини давом эттириб, 5 очколик фарқни сақлаб қолди. 

Манбага интервью берган испаниялик футболчи Сеск Фабрегас Артетани клуб ҳақидаги тасаввурни ўзгартиргани учун мақтади, чунки Артета "Арсенал"ни чемпионатда кучли тўртликка кириш учун курашадиган жамоадан Европанинг энг кучли жамоаларидан бирига айлантирди. 

"У ажойиб ишлади. Биз буни ҳужжатли фильмда кўрдик. У қандай қилиб футболчиларни олдинга юришга чорлашини ва у футболчиларни қай даражада тушуна олишига гувоҳ бўлдик. 

Клуб ҳақидаги тасаввур ўзгарди. Машғулотлар майдончаси атрофида яхши ўзгаришлар бор, каттароқ жойлар, яхши жиҳозлар, майдонлар, нимаики ўйласангиз ҳамма нарса бор.

Унинг ўз қарашлари бор эди ва у баъзи тўғри ишларни қилмаган футболчиларни сотганида клуб уни қўллаб-қувватлади. Артета уларни ўзгартирди. Ёш менежер учун буни бажариш осон бўлмайди. Бундай қарорларни қабул қилиш учун шахсият керак. 

Уларда (Зинченко ва Жезусда) клубга бўлган иштиёқ бор. Улар бугунги кунда сиздан устун бўлган клубдан келдилар. Топ-ўйинчилар билан алоқада бўлган мураббийга эга бўлиш, албатта, клуб учун катта плюс", – деди Сеск Фабрегас.