Эсингиздами? Рисқуллаев "Локомотив" фойдасига шубҳали пенальти қўйганди

ПФЛ сайти хабар берганидек, бугун бўлиб ўтадиган Ўзбекистон Кубогининг 1/4 финалидан ўрин олган "Пахтакор" - "Локомотив" учрашувини Виктор Серазетдинов бошқариши керак эди. Аммо ўйин стартига кам вақт қолган бир пайтда тўсатдан бош ҳакам ўзгарди.

Эндиликда бу учрашувни Аҳрол Рисқуллаев бошқариб боради. Олий даражадаги ўйинларни бошқаришни бошлаганига ҳали кўп бўлмаган Рисқуллаев бу мавсум асосан Суперлиганинг 8-туридан ўрин олган баҳсда йўл қўйган хатоси билан ёдда қолган. Ўшанда у "Бунёдкор" - "Локомотив" баҳсида ҳакамлик қилганди.

Эсингизда бўлса, ўша учрашувда "Локомотив" меҳмонда 2:1 ҳисобида зафар қучган, ўйиннинг 86-дақиқасида "темирйўлчилар" пенальтидан тўп киритишганди. "Бунёдкор" дарвозаси томон пенальти белгиланиши жуда ғалати бўлганди. Мезбонлар ҳимоячиси Анвар Ғофуров жарима майдончаси ташқарисида Марат Бикмаевдан тўпни узоқлаштирган, бунинг натижасида Бикмаевнинг йиқилиши туфайли Рисқуллаев иккиланиб пенальти белгилаганди.

Унга қанотда ёрдам берган Алишер Усмонов эса пенальти бўлгани ҳақида сигнал бермаган, чунки байроқчасини кўтармаганди. Рисқуллаев дастлаб орқага қайтиб, кейин яна югуриб келиб охири нуқтани кўрсатганди. Хуллас, роса машмаша бўлганди.

ПФЛ ўз сайтида бугунги учрашув ҳаками ўзгарганини ўйин даражаси юқорилиги билан изоҳлади. Бу олдиндан маълум эди, чунки чорак финал битта учрашувдан иборат. Қолаверса, майдонда иккита энг кучли жамоа ўйнайди. Шу боис ПФЛнинг нима сабабдан вақтлироқ бу ҳақда ўйлаб кўрмагани ғалати. Умид қиламизки, бугунги баҳс ҳаққоний ва ҳеч қайси томоннинг эътирозисиз ўтади.