Эшитдик-да! Мочиновга раҳбарият 2та ўйинга имконият берган

Жамоа 6-тур ўтдики ҳамон ғалаба нималигини билмай келмоқда. "Бухоро" ўз майдонида 2-турда "Динамо" билан дуранг қайд этиб, ўз ҳисобига битта очко ёздириб қўйганди. Қолган бешта учрашувда мағлубиятга учради. Бугунги кунда натижа биринчи ўрин турибди. Гарчи мураббий келажак учун ишлаётган бўлсада, натижа ижобий бўлмаса раҳбарият "дирижёр"ни зудлик билан алмаштиришга қарор қилади. 

Албатта мағлубият ҳеч кимга ёқмайди. "Бухоро" ўтган шанба куни ўз майдонида "Олмалиқ"дан йирик ҳисобда мағлуб бўлди. Мухлислар норози. Учрашувдан кейинги матбуот анжуманида ҳам Мочинов мағлубият ва жамоанинг омадсиз иштироки учун барча айбни ўз зиммасига олишини таъкидлаб ўтган. 

Кейинроқ эшитишимизча "Бухоро" раҳбарияти бош мураббийга яна иккита ўйинда ишонч билдирган холда, вазиятни ижобий томонга ўзгартириши учун имконият беришини айтган. 

Агарда ҳақиқатдан ҳам шундай бўлса, Мочинов учун олий лиганинг 7-8-тур ўйинлари жуда ҳам муҳим аҳамият касб этади. Жуда қийин бўлиши турган гап. Чунки икки ўйин ҳам сафарда, "Қўқон-1912" ва "Машъал" клубларига қарши кечади.   

Демак, бухороликлар 2 май куни Қўқонда ўйнашса, 9 май куни эса Муборакда "Машъал"га қарши баҳс олиб боради.